2024-02-06
喂，各位Android用家，你有冇試過上網嗰陣，或者碌緊社交媒體、望緊WhatsApp群組嘅時候，突然見到啲好有趣嘅嘢？可能係一個你唔熟悉嘅詞語、一個你從未去過嘅城市，又或者係一間朋友推介嘅新咖啡店。而家有咗「圈選搜尋」，當你嘅好奇心被激起嗰一刻，你就可以即刻搵到更多相關資訊。
圈選搜尋
「圈選搜尋」功能陸續登陸Pixel 8、Pixel 8 Pro，同埋全新嘅Samsung Galaxy S24系列手機。你可以用一個簡單嘅手勢，例如：畫個圈、點選、塗鴉或者輕輕一按，就可以進行圈選搜尋，完全唔洗再切換去搜尋引擎或者其他App。現存至少有五種「圈選搜尋」嘅實用方法，幫你分析比較食店、甚至睇睇下片想買主角手上隻錶都可以一圈做到！
五個「圈選搜尋」嘅實用方法
1. 某某Youtuber件衫幾好睇，不過唔知係邊到買？
例如你喺網上見到有人著緊一件獨特圖案嘅上衣，或者睇到一個設計得好靚嘅旋轉蛋糕架，你只需要長按主頁按鈕或導航欄，然後圈住或者隨便畫一畫你感興趣嘅產品。之後你就可以喺網上嘅零售商度買到即時落單同款或類似嘅選擇。
2. 難詞新字 一圈查明
當你睇緊一段影片，影片中有一款寫住「prebiotic」嘅飲品，但你唔肯定佢同「probiotic」有咩分別。以前你可能要離開當前頁面去搜尋，但而家，只需要長按主頁按鈕或導航欄啟動「圈選搜尋」，然後標記點選「prebiotic」，就可以了解更多關於佢嘅資訊，之後輕輕滑走就可以繼續睇片唔會太過打擾睇片節奏同體驗。
3. 見到人地遊歷秘地想知道確實地點？
「圈選搜尋」甚至可以為你下一次嘅旅行提供靈感。可能你喺影片或者社交媒體見到有人介紹緊一個城市，然後你見到一個設計獨特嘅建築物。以前你需要先截圖再尋真；而家有咗「圈選搜尋」，你只需要喺張相上面隨便圈吓畫吓，就可以快速識別佢嘅所在地，了解佢嘅故事甚至將佢加入未來旅行清單入面！
4. 兩間餐廳唔知邊間更加啱自己？
有無試過同朋友用WhatsApp傾緊今晚食邊間餐廳，點知各自揀咗一間餐廳唔知點算好？Android嘅新功能可以幫助你喺WhatsApp同其他App同時搜尋食評！只需要長按主頁按鈕或導航欄，然後點選其中一間餐廳嘅名。喺唔離開你嘅即時通訊程式情況下，你就可以睇到嗰間餐廳嘅菜單、受歡迎菜式嘅相、顧客評論同埋餐廳嘅位置。咁樣喺唔需要關閉WhatsApp嘅情況下，大家都可以得出最好結論！
5. 提問更複雜嘅問題
「圈選搜尋」唔單止可以快速提供資訊，仲可以提供AI驅動嘅綜覽（部分國家提供）。假設你喺社交媒體見到好多人轉發一個煎餅嘅內容，想知道點解呢啲美食咁紅。你就可以用「圈選搜尋」查佢哋，再問更深入嘅問題，比如「點解咁受歡迎？」你將會迅速得知呢個其實係韓國煎餅，並從網上整合嘅資訊中明白佢哋咁受歡迎嘅原因。搜尋以外，更深入了解箇中詳情。
想像下你喺一個繁忙嘅日子，一隻手拎住咖啡，另一隻手就可以操作手機，用「圈選搜尋」輕鬆地獲取你想知嘅嘢（當然包括點解球員唔落場啦）！
以後唔洗識，都Search到！
「圈選搜尋」嘅推出，對於我哋呢啲經常需要即時資訊嘅人來講，絕對係一個Game Changer。航行喺互聯網嘅汪洋當中，資訊泛濫內容數之不盡，真正嘅挑戰在於如何快速、方便咁獲取我哋所需。而Google呢個創新功能，就好似為我哋嘅智能手機裝上咗一副超能力眼鏡，令我哋可以更有效率地航行喺呢個波瀾壯闊嘅資訊洪流之中。同時間，當呢項技術成熟後，大眾嘅搜尋習慣以至對現行嘅搜尋引擎行帶嚟一定嘅變。
